(البيت المسكون............كاملة)

(البيت المسكون............كاملة) - بقلم / زوزيــتا

(البيت المسكون............كاملة)
ناهد و أسماء أصدقاء و في أول سنه جامعه.. و الجامعه اللي هم فيها بعيده جدآ عنهم.. اتفقوا يأجروا شقة قريب من الجامعه طول فترة الدراسة و أقنعوا أهلهم بالعافيه لغاية ما وافقوا....وفضلوا يدوروا لغاية ما لقوا بيت قريب جدآ من الجامعه لكن في مكان مقطوع ومفيش جنبه غير بيت واحد ومفيش حد عايش فيه .. ناهد قالت ل أسماء...
ناهد: احنا نتكل على الله و خلاص.. مفيش اي مكان تاني غير البيت ده.. احنا نقفل علينا كويس و منفتحش لأي حد وخلاص
أسماء: لأ احنا لوحدنا . نسكن ازاي في مكان مقطوع زي ده
ناهد: ايه يا خوافه انتي.. يعني ايه اللي هيحصل.. احنا بس نخلي بالنا و منفتحش لحد
أسماء: يعني رأيك كده
ناهد : اه طبعا
أسماء: طيب تعالي نرجع تاني نتفق مع صاحب البيت
ناهد: اوك يلا
(ورجعوا تاني ل صاحب البيت يتفقوا معاه)
ناهد: احنا فكرنا خلاص.. عايزين نأجر البيت.. بس احنا طلاب و عايزين الايجار ميكونش غالي
صاحب البيت: علشان خاطركم الايجار 200 جنيه
أسماء: 200 بس
صاحب البيت: ده علشان خاطركم بس
ناهد: الله يكرمك
صاحب البيت: خدوا المفتاح أهو.. ممكن تفرشوا البيت من بكرة
أسماء: متشكرين أوي
صاحب البيت: لا شكر على واجب
(وثاني يوم جابوا كل الحاجات اللي محتاجنها و فرشوا البيت )
أسماء: البيت حلو أوي وبقى أجمل لما اتفرش
ناهد: فعلا جميل أوي.. مكنش بالجمال ده لما فرجنا عليه صاحب البيت علشان مكنش مفروش
أسماء: فعلا
ناهد: بقولك ايه.. انا الحر هيموتني..هروح أخد شاور على السريع و أجي
أسماء: وانا كمان لما تطلعي هروح بعدك
ناهد: اوكي
((وقامت دخلت الحمام.. وبعد 10 دقائق أسماء وهي قعده في الصاله شافتها خرجت ودخلت الاوضه وقفلت على نفسها))
أسماء: أموت أنا في السريع.. ايوة كده
(وقامت خبطت على الأوضه اللي ناهد دخلتها)
أسماء: ناهد.. يا ناهد.. أفتحي يابنتي عايزة أخد حاجه من عندك و أخرج.. انتي يا زفته افتحي..
(وسمعت صوت مياه في الحمام)
أسماء: ايه ده.. غريبه أوي
(وراحت الحمام لاقيته مقفول و صوت مياه جوه)
أسماء: ناهد.. انتي هنا؟؟
ناهد: ايوة يا هبلة.. هيكون مين يعني
(أسماء مرضيتش تحكلها.. علشان مش عايزاها تخاف ورجعت قعدت في الصاله تاني.. لغاية ما ناهد خرجت)
ناهد: يلا دورك
أسماء: لأ لأ مش عاوزة
ناهد: ليه يا بنتي.. هتفضلي معفنه كده
أسماء: حاولي تفتحي الأوضه دي كده(وشاورت على الأوضه)
ناهد: أشمعنى يعني
أسماء: أسمعي الكلام بس
ناهد: اوك
(وراحت فتحت الأوضه و الاوضه اتفتحت عادي)
ناهد: ايه بقى.. في ايه
أسماء: لأ بقى.. البيت ده في حاجه مش طبيعيه صدقيني
ناهد: حاجه مش طبيعيه ازاي يعني
أسماء: انا من شويه شوفتك خرجتي....(وحكتلها اللي حصل)
ناهد: غريبه أوي.. انتي قلقتيني بجد
أسماء: أحنا لازم نمشي من هنا
ناهد: الليل دخل خلاص .. نمشي فين
أسماء: مش لازم النهارده.. نقعد النهارده وربنا يستر.. بكرة بقى
ناهد: لا بكرة ولا النهارده.. احنا لو رجعنا أهلنا هيقلقوا أكتر من الأول ومش هيخلونا نأجر بيت تاني
أسماء: يعني ايه.. انا همشي و انتي براحتك بقى
ناهد: يعني ايه هتسيبيني و تمشي
أسماء: انا خايفة بصراحه
ناهد: ميبقاش قلبك ضعيف كده.. ان شاء الله مفيش حاجه هتحصل
أسماء: (بصوت عالي) يعني في شارع مقطوع لوحدنا و تقولي قلبك ضعيف و اهلنا المفروض اننا هنعرفهم مكانا بكرة يعني لو حصلنا حاجه و صرخنا للصبح محدش هيحس بينا وكمان اهلنا مش هيعرفوا يوصالولنا و تقوليلي ميبقاش قلبك ضعيف.. انتي هتجننيني
ناهد: هدي نفسك ..مالك اتعصبتي كده ليه.. يانهااااااار .. ادي النور قطع كمان.. كملت
أسماء: أنا مرعوبه بجد.. احنا مفيش معانا شمع ولا اي حاجه ننور بيها والدنيا كحل
ناهد: ننور ب موبايلي أو موبايلك.. هو موبايلك فين؟؟
أسماء: في الصاله.. ومستحيل اتحرك من مكاني علشان اجيبه.. انتي موبايلك فين طيب
ناهد: مش عارفه.. بس انا مطلعتوش من الشنطة.. والشنطة مش عارفه حطتها فين
أسماء: سامعه.. في صوت غريب أوي
ناهد: بسم الله الرحمن الرحيم.. فعلا..صوت زي صوت ديب بس لأ لأ مستحيل يكون ديب طبعا
أسماء: الصوت بيقرب يا ناهد
ناهد: انا بجد خوفت... ياااارب
أسماء: يارب النور ييجي
ناهد: الصوت اختفى.. انا هقوم اشوف حاجه ننور بيها
أسماء: لأ لأ بلاش
ناهد: لازم اتصرف .. هنفضل قعدين في الضلمة كده.. ده احنا مش شايفين بعض
أسماء: طيب شوفي موبايلي في الصاله
ناهد: ماشي(وخرجت)
أسماء: (بصوت عالي جدآ) الحقيييييني نااااااهد.. في أيد على كتفي
ناهد: أسماااااء.. انا مش حافظه البيت لسة..مش عارفه انا فين دلوقتي.. انا خايفة أوي
أسماء: بقووووووولك في أيد على كتفييي.. الحقييييني حاولي تيجي عندي
ناهد: أعوذ بالله من الشيطان الرجيم.. أسماااء انا خبط ف حد
(ولقيت صوت راجل خشن جدآ و مخيف بيقولها)
الصوت: انتوا ايه اللي جابكم هنا
ناهد:(وهي خايفه) انت مين
الصوت: انتوا ايه جابكم هنا
ناهد:بقولك انت مين
الصوت: انتوا ايه اللي جابكم هنا
ناهد: انت حرامي صح
الصوت:مش عاوزة تردي
ناهد: احنا جايين علشان الجامعه بتاعتنا
الصوت: مش هتخرجي من هنا..مش هتخرجي من هنا..مش هتخرجي من هنا
ناهد: انت هتأذيني.. وبعدين انت بتكرر الكلام كده ليه.. انت انسان غريب جدآ
الصوت:(بصوت عالي) أنا مش أنسااان
ناهد: أسماااااااااااء... اسماااااء .. الحقييييني
(والنور جه و ناهد جريت ل أسماء)
ناهد: اسماء.. الحقيني .. في حد ك..
أسماء: (قطعت كلامها وأتكلمت وهي خايفة) في ست كانت بتكلمني من شويه
ناهد:قالتلك ايه.. وأهدي شويه علشان تعرفي تتكملي
أسماء: (بكت وقالت) انا مش قادرة استحمل خلاص.. انا خايفة أوي
ناهد: أول ما النهار يطلع ..نمشي من هنا..لازم
أسماء: دي الساعه لسة واحدة.. انا هقوم اجيب موبايلي نكلم حد ييجي يلحقنا
ناهد: صح.. وانا هشوف حطيت شنطتي فين
(و قاموا الاثنين يجيبوا موبايلاتهم)
أسماء: الحقي.. مفيش شبكة خالص
ناهد: ولا عندي كمان
أسماء: ياريتني كنت استنيت اخويا يرجع من الشغل وييجي معانا.. احنا استعجلنا أوي.. هنتصرف ازاي دلوقتي
أسماء:انا عايزة ادخل الحمام و خايفة أوي
ناهد:أدخلي وانا هقف برة علشان متخافيش
أسماء:ماشي
(ودخلت الحمام)
ناهد سمعت أسماء بتصرخ ..حاولت تفتح باب الحمام لكن مقفول من جوة
ناهد: أسماء .. في ايه..ردي عليا .. مالك..سكتي كده ليه في ايه..أسمااء
(وفجأة سمعت صوت في الحمام غريب جدآ و مخيف صوت شبه زئير الاسد)
ناهد: ايه ده.. مين عندك
(وحاولت تزق الباب بكل قوتها .. لكن معرفتش ولما فقدت الامل .. الباب اتفتح لوحده..ولقيت أسماء في الارض و كلها دم .. ناهد جريت على أسماء و حضنتها)
ناهد: (وهي بتبكي) أسماء .. ايه حصلك.. انا مش قادرة اصدق اللي انا شايفاه..انتي مش بتردي ليه.. ردي علياااا .. قوليلي أنك عايشة.. متسيبينيش أرجوكي.. انتي صديقتي الوحيده..متسيبينيش
(وفجأة ظهر قدامها مخلوق غريب عملاق.. شكله مخيف..لابس أسود في أسود.. و ضوافرة طويله جدآ و رفيعه .. عاملة زي المسامير
ناهد: (وهي خايفه) أنت مين.. انت مش انسان .. انت جن
الجن: أنا واحد من صحاب البيت ده
(وفضل يقرب منها بخطوات بطيئه جدآ جريت منه و فتحت باب البيت و خرجت..كانت الساعه 2:30 والدنيا ضلمه جدآ .. ناهد فضلت تجري في الضلمة وهي مش شايفه حاجه )
ناهد:ياااااااارب .. أعمل ايه.. انا مش شايفه اي حاجه خالص
(بدأت تنادي بصوت عالي)
ناهد: الحقوووووووني... ساعدووووني.. محتاجه ل مسااااعده
(سمعت شاب من بعيد بيقول)
الشاب:مين..في حد بينادي..مين عاايز مسااعده
ناهد: أناااا .. أرجووك ساعدني
الشاب: انتي فين.. انا مش شايف حاجه خالص
ناهد: لو معاك حاجه تنور بيها .. ياريت تنورلي
الشاب: طيب .. استنيني ربع ساعه كده على ما أوصل البيت .. هجيب حاجه انور بيها و أجي
ناهد: أرجوك أوعى متجيش
الشاب: متخافيش .. هاجي
(الشاب مشي..وبعد نص ساعه رجع ومعاه كشاف ينور بيه)
الشاب: (بصوت عالي) انتي هناااا.. انتي هنا ولا مشيتي
ناهد: ايوة ايوة .. انا هنا
الشاب: اه .. انا شوفتك .. أنا جايلك
(وراح ل ناهد)
الشاب: انتي ايه اللي جايبك في المكان ده.. وايه الدم اللي عليكي ده
ناهد: (وهي بتبكي) انا ف مشكلة.. أجرت بيت انا و صاحبتي وطلع مسكون..وكل اللي انت شايفه ده دم صاحبتي
الشاب: دم صاحبتك ازاي.. هي ايه حصلها
ناهد: مش عارفه.. يارب تكون عايشه
الشاب: طيب انتي عايزة ايه .. انا تحت امرك في اي خدمه
ناهد: انا عايزاك تساعدني.. عايزة اروح
الشاب: انتي منين.. اهلك فين
ناهد: في اسكندرية
الشاب: ياااااااااااه.. ده احنا في القاهرة.. انتي مستحيل تلاقي موصلات دلوقتي
ناهد: طيب اتصرف ازاي
الشاب: انا لو أخدتك معايا الشقة .. هنسمع كلام قد كده من الجيران.. كل اللي اقدر اساعدك بيه اني أجي معاكي البيت اللي أجرتيه علشان متخافيش.. لغاية ما النهار يطلع
ناهد: لأ.. انا خايفة ارجع تاني.. بس صاحبتي.. لو عايشة مينفعش اسيبها لوحدها
الشاب: لو عايزاني أجي معاكي .. مفيش مشكله
ناهد: مش هتخاف
الشاب: لأ طبعا..انا مبخافش
ناهد:متشكرة أوي.. هو انت اسمك ايه
الشاب: اسمي ساهر..وأنتي
ناهد: ناهد
ساهر: أهلآ بيكي
ناهد: هو انت ساكن قريب من هنا
ساهر: قريب بس مش أوي.. انا قربت من هنا علشان كنت بدور على سوبر ماركت فاتح .. كنت جعان ومفيش أكل في البيت..ولما سمعتك جيت على صوتك
ناهد: انا اتشرفت بمعرفتك
ساهر: وانا كمان... هو البيت فين.. احنا قربنا نوصل
ناهد: (شاورت وقالت) هو اللي هناك ده
ساهر: ماشي.. قربنا خالص.. انتي مشيتي كل ده في الضلمه
ناهد: الخوف يعمل أكتر من كده
(وفضلوا يتكلموا لغاية ما وصلوا)
ناهد: انا خايفة اوي
ساهر:لا متخافيش.. معاكي مفاتيح البيت
ناهد: لا الباب مفتوح.. تعالى اتفضل
ساهر: اوكي.. (ودخل) معاكي مفاتيح البيت
ناهد: أكيد.. ليه
ساهر: علشان نقفل الباب كويس.. الشارع هنا مقطوع وممكن اي حرامي يدخل
ناهد: عندك حق.. بس الاول تعالى نشوف صاحبتي.. انا سبتها ف الحمام و مش عارفه هي عايشة ولا ماتت
ساهر: روحي هاتي المفتاح و انا هتصرف
ناهد: ماشي
(دخلت جابت المفاتيح و طلعت قفلت الباب)
ساهر: هاتي المفتاح.. خليه معايا
ناهد: ليه
ساهر: منضمنش ايه هيحصل للصبح.. لو حد جه انا هفتحله
ناهد: احنا مش هنفتح لحد
ساهر: واذا كان صاحب البيت.. لازم نفتح
ناهد: وصاحب البيت هاييجي متأخر كده.. عموما اهو المفتاح خليه معاك
ساهر: تعالي بقى نشوف صاحبتك
ناهد: ياريت .. يلا
(وراحوا الاثنين يشوفوا اسماء.. ملقوش غير اثار دم وهي مش موجوده)
ناهد: راحت فين.. والله كانت هنا.. يارب تكون عايشه
ساهر: غريبه جدا.. بس واضح انها كانت هنا .. الارض كلها دم
ناهد: انا هموت خلاص.. بجد تعبت
ساهر: بعد الشر عليكي.. المهم ان في امل تكون صاحبتك عايشة
اسماء: ايوة الحمد لله.. بس هتكون راحت فين بس
ساهر: ممكن تكون خرجت واحنا برة
ناهد: لو خرجت كنا هنشوفها.. مفيش شارع تاني تمشي منه
ساهر: مش بعيد لما تمشي تلاقيها ف بيتها
ناهد: يارب
ساهر: انتي مال عينك بتغمض كده ليه
ناهد: انا بقالي يومين منمتش.. هموت بجد من التعب و القلق
ساهر: لا كده غلط عليكي.. لازم تنامي
ناهد: هو انا هيجيلي نوم من اللي حصل
ساهر: لا هتنامي.. ده انتي بتنامي وانتي قعده.. ادخلي الاوضة ونامي
ناهد: وانت
ساهر: لا انا مش جايلي نوم
ناهد: انا خايفة ادخل الاوضه لوحدي.. لو مش عايز تنام.. اقعد جنبي
ساهر: حاضر.. هاجي معاكي
(ناهد مشيت قدام ساهر و بصت وراها و قالتله)
ناهد: طيب ما تحاول..!!!! انت بتبصلي كده ليه
ساهر: ببصلك عادي.. ازاي ببصلك كده ليه
ناهد: لأ بتبصلي بصة غريبه
ساهر: انتي اعصابك تعبانة خالص.. مينفعش كده
ناهد: (دخلت الاوضة وقالتله) ربنا يستر
ساهر: نامي و بطلي تهيئات
(ناهد غمضت عينها و فضلت تفكر.. قالت انا هفتح على فجأه و اشوف ساهر لسة بيبصلي النظرة الغريبه دي ولا لأ.....و فتحت فجأه)
ناهد: ايه ده ... انت مقرب وشك ليا كده ليه... بتبصلي كده ليه
ساهر: انا مش ببصلك.. انا بفتكر
ناهد: بتبفتكر ايه
ساهر: اصلك نايمة ف نفس المكان اللي مت فيه
ناهد: ايه .. انت بتقول ايه(وقامت قعدت) انت بتهزر صح
(ساهر اختفى)
ناهد: ياااااااااااااااااااااااااارب.. يااااااااااااااارب.. انا هموت خلاص.. يارب انقذني..
(وهي بتدعي .. اسماء فتحت باب الاوضة ودخلتلها.. بنفس الشكل اللي كانت بيه ف الحمام .. كلها دم)
ناهد: اسماء...(وجريت عليها علشان تحضنها)
أسماء: متقربيش.. اسماء ماتت
ناهد: اسماء.. ايه اللي بتقوليه ده.. ماانتي قدامي
اسماء: اسماء ماتت
ناهد: يعني ايه.. (وفضلت ترجع لورا)
اسماء: متخافيش.. انا جاية اساعدك
ناهد: ازاي .. لو انتي مش اسماء.. فين جثت اسماء
اسماء: جثتها تحت الارض.. ومش جثتها بس .. في قبلها رياض و سارة و تغريد و ساهر و نبيل ونجوى.. وكتير اوي.. وكل دول ارواحهم هنا.. انا جاية اطلعك.. علشان المكان ده مفيهوش غير جان و ارواح
ناهد: بس........
اسماء: متتكلميش كتير.. لو النهار طلع.. مش هعرف اساعدك وهتفتضلي محبوسة هنا.. وعلى فكرة ساهر حاول كذا مرة يقتلك وانا كنت بمنعه
.. تعالي ورايا بسرعه
ناهد: حاضر.. انا خايفة حد يشوفني
اسماء: مفيش حد منهم برة .. تعالي
ناهد: حاضر.. بس الباب مقفول و مفتاحه مع ساهر
(اسماء زقت الباب اتكسر)
ناهد: انا خايفة.. بجد خايفة
أسماء: مدي بسرعه.. قبل ما النهار يطلع
ناهد: الدنيا ضلمة .. مش شايفة حاجه
أسماء: امشي قدامك و خلاص.. مش لازم تشوفي
( وصلوا للشارع )
ناهد: مش هشوفك تاني(وبكت)
اسماء: هتوحشيني
(الفجر اذن.. و اسماء اختفت.. وناهد فضلت ماشية لغاية ما النهار طلع ولقيت مواصلات ورجعت بيتها.. خبطت على الباب فتح اخوها مراد)
مراد:ايه ده.. ايه الدم ده.. في ايه
(ناهد حضنت اخوها وقالت)
ناهد: انا مش مصدقة اني رجعت
مراد:ايه اللي حصل.. ادخلي
(دخلت .. وكان والدتها و والدها قعدين ف الصاله)
ام ناهد: ايه ده.. بنتي(وحضنتها) مالك
ابو ناهد: ايه اللي حصل
ناهد: هحكلكم على كل حاجه
(و حكتلهم على كل اللي حصلها)
مراد: فين صاحب البيت ده.. انا لازم اروحله.. وربنا لا أخد حقك وحق اسماء
ناهد: لا بلاش.. خلاص اللي حصل حصل.. انا خايفة عليك
مراد: لا متخافيش انا هاخد عزت معايا.. الراجل ده لازم يتحبس
ناهد: احنا اول مرة قابلناه ف الشارع و سألناه على شقة للأيجار.. فرجنا البيت و قالنا عنوانه .. وتاني مرة روحنا و اتفقنا معاه
مراد: (بصوت عالي) انتوا اغبيه.. ازاي تأمنه لواحد متعرفهوش.. المهم فين بيته
ناهد: انا هاجي معاك و اوريهولك

وثاني يوم راح مراد و ناهد لـ أهل أسماء
وعزت أخو أسماء هو اللي راح مع مراد و ناهد ل صاحب البيت..
ناهد: أهو .. هو ده البيت
(خبطوا على الباب مفيش حد بيفتح.. وفي نفس الوقت شاب كان ماشي ف الشارع قالهم)
الشاب: أنتوا بتخبطوا على مين
ناهد: على أستاذ حسام
الشاب: أستاذ حسام مين.. انتوا أكيد متلخبطين في البيت.. البيت ده مهجور من سنين
ناهد: ايه اللي انت بتقوله ده.. انا دخلت البيت و أتكلمت مع صاحبه.. ازاي يعني مهجور
الشاب: دخلتي البيت و أتكلمتي مع صاحبه.. مجنونه دي ولا ايه
مراد: ما تحترم نفسك.. احسن أجي اعلمك الأدب
الشاب: خلاص وانا مالي.. خليكوا خبطوا للصبح(ومشي)
مراد: مصيبه لو كان كلامه صح
ناهد: كلامه صح ازاي.. والله انا دخلت البيت ده .. مش مهجور لأ
عزت: طيب تعالوا نسأل حد من الجيران ممكن يعرفوا هو فين
ناهد: اه صح.. يلا
(وراحوا للجيران يسألوهم فتح راجل)
ناهد: لو سمحت.. متعرفش أستاذ حسام هيرجع أمتى
الراجل: استاذ حسام مين
ناهد: جاركم اللي في البيت اللي قصادكم
الراجل: البيت اللي قصادناا؟؟ انهو بيت
ناهد: (شاورت على البيت) البيت ده
الراجل: لأ البيت ده مهجور.. ومفيش حد في الشارع هنا أسمه حسام
ناهد: لأ ازاي في واحد......
مراد: خلاص يا ناهد.. (وبص للراجل) ماشي شكرآ
الراجل: اي خدمة
مراد: شكرآ.. يلا يا جماعه
(ومشيوا كلهم)
عزت: بقولكم ايه بقى .. انا مش عايز استهبال
مراد: استهبال ايه.. مش فاهم
عزت: يعني لو أختك مكان أختي.. وجينا نقولك اللي قتلها العفاريت انتوا هتصدقوا.. ده كلام ميدخلش دماغ عيل صغير.. انا عايز اعرف انتوا عملتوا في أختي ايه
ناهد: انت تقصد ايه.. وضح كلامك
عزت: لو أختي فعلا ماتت .. تبقى انتي اللي قتلتيها
ناهد: أنا..أنا ياعزت.. هو انا و أسماء عشرت يومين.. الله يسامحك
عزت: بطلي تمثيل بقى.. أختي فين يا ناهد
مراد: بقولك اييه.. مسمحلكش تكلم أختي بالأسلوب ده
عزت: ياأخي خلي عندك ضمير وحط نفسك مكاني
مراد: ده قدر ربنا
عزت: طيب.. أنا عايز أروح البيت اللي انتي بتقولي عليه يا ناهد
ناهد: بيت ايه
عزت: اللي أجرتيه انتي و أختي.. مش بتقولي مسكون.. انا بقى عايز اشوف العفاريت دي علشان أتأكد
ناهد: تبقى عايز تموت بقى
عزت: بالظبط.. انا عايز أموت..ملكيش فيه
ناهد: عايز تروح روح لوحدك..انا و أخويا مش هنيجي معاك
عزت: ماشي.. قوليلي العنوان وانا هروح
ناهد: انا هاجي معاك .. و هوريهولك من بعيد.. و همشي
عزت: ماشي اتفضلي
مراد: فكر كويس يا عزت
عزت: انا فكرت كويس.. بس ايه بقى يضمنلي أنك هتوديني البيت فعلا.. مش ممكن توديني بيت تاني انتي عارفه انه مسكون
ناهد: لو عايزني أوصفلك البيت من جوة معنديش مانع.. وكمان كل الحاجات اللي كانت معانا هناك.. هتلاقي البيت مفروش.. والباب اللي برة مكسور
عزت: ماشي هروح وأتأكد بنفسي
ناهد: طيب هتتأكد ازاي اذا كان الأرواح اللي في البيت مش بتظهر غير بالليل.. وأحنا لسة الظهر
عزت: سهلة .. وريني البيت وهروح بالليل
ناهد: براحتك.. بس خليك فاكر اني قولتلك بلاش
عزت: ماشي فاكر
(ناهد راحت توري البيت ل عزت و وقفت من بعيد و شاورت ل عزت على البيت .. ورجعوا كلهم.... ونفس اليوم بالليل خرج عزت و أخد معاه والده و والدته وراحه للبيت)
أبو أسماء: فعلا الباب مكسور .. معنى كده ان روح أسماء هي اللي خرجتها زي ما قالتلنا ناهد
عزت: لالا ده كلام مش مقنع.. أختي هي اللي قتلتها
(وفجأه ظهرت أسماء قدامهم)
أسماء: لأ مقتلتنيش.. أمشوا من هنا
أم أسماء: بنتي..
.(وحاولت تحضنها لكن لاقيتها هوى)
أسماء: أكيد انتي كده أتأكدتي ان كلام ناهد صح.. ياريت كلكم تمشوا من هنا
(وأختفت)
أم أسماء:(وهي بتبكي) كلام ناهد فعلا صح.. يلا نمشي من هنا
(رجعوا كلهم بيتهم.. وعرفه ان ناهد بتقول الحقيقة و أن بنتهم الجن اللي قتلها)