قصة (((محل الموت))) كاملة - بقلم / زوزيــتا

قصة (((محل الموت))) كاملة - بقلم / زوزيــتا

قصة (((محل الموت))) كاملة
ناديه وسمير بيحبه بعض من ايام الثانوي.. يعني من 6 سنين.. سمير ظروفه صعبه والده متوفي وهو اللي شايل هم والدته و اخته
ومصدر رزقهم محل.. وكان وصية والده قبل ما يموت.. انه مش عايز المحل يتباع.. ناديه بيجلها عرسان كتير,, وبترفض عشان سمير ومستحمله..لحد ما راح شخص ل سمير المحل اسمه جابر وقاله
جابر: ازيك يا سمير
سمير: حضرتك تعرفني؟
جابر: وعارف كل حاجه عنك
سمير:غريبه.. عموما اهلا بيك
جابر: انا جايلك عشان عايز اشتري المحل ده
سمير: لكن المحل مش للبيع
جابر: بس انا هشتريه..
سمير: يظهر انك مسمعتنيش.. بقولك المحل مش للبيع
جابر: لا سمعتك.. وبقولك هاخده يعني هاخده
سمير: بالعافيه يعني.. ويعدين مافي مليون محل .. شوفلك محل تاني
جابر: لأ.. مينفعش غير ده
سمير: اشمعنا
جابر: اشمعنا دي ممكن تعرفها.. لو موافقتش تبيع المحل
سمير: انا مش فاهم حاجه
جابر: انت قدامك ثلاث اختيارات
يا تبيع المحل
يا تبقى معانا وتعرف سرنا
يا تعرف سرنا ومترضاش تبقى معانا وساعتها هنقتلك
.. هسيبك يومين تفكر فيهم وهجيلك تاني (ومشي)
(سمير وقف مش بيتحرك ولا بيرد ومش قادر يستوعب اللي سمعه.. بعدين قفل المحل وراح البيت يقول لوالدته اللي حصل)
سمير:ماما انا هتجنن.. في حاجه غريبه اوي حصلت
أم سمير: خير .. ايه حصل
سمير: واحد غريب اوي جالي المحل.. وعايز يشتريه
أم سمير: ماانت عارف وصية ابوك المحل ميتبعش..وبعدين غريب ليه
سمير: بيقولي في سر لو عرفته هموت يا لازم اكون معاهم
أم سمير: غريبه سر ايه
سمير: مش عارف.. انا داخل أوضتي
(سمير دخل أوضته وأتصل ب نادية)
سمير: ازيك يا حبيبتي
ناديه: الحمد لله.. انت ايه اخبارك
سمير: هتجنن.. واحد جالي المحل.. قالي كلام غريب أوي
ناديه: خير يا حبيبي.. كلام ايه
سمير:قالي انه عايز يشتري المحل.............(وحكالها اللي حصل)
ناديه: سر ايه وهبل ايه.. تلاقيه بيخوفك عشان تبيع المحل..متحطش في بالك
سمير: تفتكري
ناديه: طبعا
(سمير اقتنع جدا بكلام نادية)
سمير: كلامك طمني أوي,,, انا هسيبك بقى اصلي قفلت المحل بدري من القلق.. هروح افتح
ناديه: ماشي.. خلي بالك من نفسك
سمير: وانتي ياحبيبي خلي بالك من نفسك
(سمير راح المحل .. ومفكرش خالص فاللي قاله جابر .. لغاية ما فاتت المهله.. وجابر جاله ومعاه ثلاثه كمان)
جابر: انتوا طبعا عارفين سمير... اعرفك يا سمير.. هاني وماجد وفرج
سمير:( سمير خاف قوي ) اهلا بيكم
هاني: اهلا يا سمير
جابر: فكرت ف اللي قولته ليك
سمير: انا مش هبيع المحل
جابر: يعني عايز تبقى معانا
سمير: انا مش فاهم حاجه
جابر: يبقى نفهمك
جابر: احنا بنتاجر في اعضاء البني أدمن
سمير: نعم!!! وايه مطلوب مني
جابر: محلك هو اللي هيساعدنا في مشروعنا.. اصلنا بقينا بنتعامل مع دول اجنبيه كذا دولةاجنبيه..ومحتاجين اعضاء كتير
سمير:مزهول:.. اعضاء كتير.. يعني هتعمله ايه
جابر: انت محلك هو و المستشفى اللي بنتعامل معاها حيطة واحدة..عايزين نعمل شوية توضيبات في المحل.. يعني
البروفه دي هتتنقلها تبقى في أخر المحل لجوة..وهنعمل أوضه تحت الأرض تحت البروفه بالظبط وهتكون واسعه
وهنعمل زرار عندنا في الاوضه ندوس عليه .. ارض البروفه تنزل تحت عندنا وفي سلم هنعمله من الأضه اللي تحت الارض يوصل لباب مخفي للمستشفى..الباب ده هندخل منه ونطلع منه ولا من شاف ولا من دري...وانت كل اللي عليك.. تمسك المخدر ده ترش بيه البروفه دايما.. وخلي بالك دايما تكون مرشوشه.. واي زبون ييجي لوحده..ويكون مش من شارعكم..تبص برة يمين وشمال.. مفيش حد مستنيه
تحاول تدخله البروفه حتى لو مش مشتري.. اقنعه بأي طريقه.. ساعتها بقى لما يدخل البروفه هيتخدر و مش هيحس بنفسه غير وهو بيتدبح
فهمت..يعني مش هتشوف دم ولا هتقتل بأيدك
سمير: انهار.. انتوا مش بني أدمين.. انا مستحيل اعمل كده.. بتبيعونا للأغراب يا زبااااله.. بتبيعوا اهل بلادكم
جابر: وطي صوتك .. لأخرسك
سمير: انا مستحيل اعمل كده
جابر: هسيبك يومين تفكر..ياتموت يا تكون معانا..وخلي بالك..انت متراقب كويس جدا..يعني لو فكرت تبلغ هتتقتل قبل ما تبلغ
وكمان كل اصدقائك متراقبين..وكمان ناديه وامك واختك..لو قولت لحد منهم وبلغ..هيتقتل قبل ما يبلغ
سمير:حراام عليييكم .. وانتو ساكتين ليه ردو عليا(ويبص ل هاني وماجد وفرج).. ده يرضي ربنا حرااام
جابر: انا اللي ليا الكلمه هنا..يلا يا جماعه.. فكر براحتك خاااالص
كلهم مشيوا وسمير هيتجنن من التفكير مش عارف يخلي حد يفكر معاه ولا قادر يقرر موته ولا قادر يساعد في قتل حد
وفاتت المهله وهو مش عارف يقولهم ايه..وجاله جابروهاني وماجد وفرج..كان في زباين استنوا لما الزباين مشيوا وقاله ل سمير
جابر: روح اقفل المحل علينا
سمير: ليه؟؟
جابر: انا مش بحب اتكلم كتير
سمير اترعب..وراح قفل المحل
واول ما قفله ورجع اتفاجئ ب هاني وفرج مكتفين ايدة ورا ضهره وماجد حاطط السكينه على رقبته
جابر: ها.. ايه قرارك
سمير مش قادر يتكلم
جابر: هعد من واحد ل عشرة.. لو فضلت ساكت كده يبقى عرفت انك قررت السكينه تمشي على رقبتك
1.........2.......3.........4..............5...........6...........
سمير:موافق..هكون معاكم
جابر:ماشي..سيبوا..احنا هنبدأفي توضيب المحل من بكرة
سمير: هتاخده وقت قد ايه
جابر: شهر كده
سمير:حاضر
جابر: اطمن مصاريفكم علينا طول الشهر ده..وقول لأهلك انك كنت محوش فلوس وقررت تغير حاجات في المحل
سمير:ماشي
جابر: انت رقمك 01225.....
سمير:عرفته ازاي
جابر: كل كام يوم تعالى المحل عشان الناس ميستغربوش لما نبقى دايما لوحدناعشان احنا هنقفل باب المحل واحنا بنشتغل.. ولما اعوزك في اي حاجه هتصل بيك .. واي حد يسألك علينا قوله عمال وجبتهم يظبطه حاجات في المحل
(سمير بقى مش عارف يعمل ايه ويطلع من الموضوع ده ازاي)
(وتاني يوم بدئو شغل في المحل وفعلا سمير قال لأهله انه عايز يغير حاجات في المحل وان في عمال بيشتغلوا فيه..فات الشهر وخلصه شغلهم في المحل وجابر اتصل ب سمير)
جابر: احنا خلصنا كل حاجه.. مش لازم نتستنا ل بكرة.. تعالى شوف شغلك النهارده
سمير: (وهو خايف)يعني خلاص خلصتوا
جابر:الخوف ده مينفعش خالص في شغلنا.. لازم يكون قلبك جامد.. تعالى دلوقتي
سمير: حاضر .. جاي
وهو خارج اخته سارة كانت في الصاله
سارة: ايه رايح فين
سمير: العمال خلصوا شغل.. ورايح اديهم اجرتهم واقعد قي المحل
سارة: مش هتتغدى قبل ما تمشي
سمير: لأ... مش جعان
سارة: انت مبقتش بتاكل .. مش شايف نفسك خسيت ازاي
سمير: انا رايح ... سلام
وخرج سمير وراح المحل
جابر: شوف شغلك بقى.. انا رايح وهدخل من المستشفى.. كل حاجه بقيت تمام
سمير: ايه ده هم راحوا فين
جابر: تقصد بقيت الزملاء.. هم دلوقتي في الاوضه تحت
سمير: ماشي
جابر: نسيت اقولك على حاجه مهمه... كل واحد هتدخلوا لينا ليك فيه 10 الاف جنيه..يعني هتتجوز ناديه في يوم واحد شغل..واحنا حطينا كاميرات في كل مكان..اي حد هتمشيه مش هيحصلك كويس
سمير:ماشي
(وخرج جابر راح المستشفى ونزل الاوضه..اللي عملوها تحت الارض)
سمير: بيفكر: يااااااااااااارب اتصرف ازاي.. مش عارف اعمل ايه... انا خايف منهم أوي.. ياررررب...وواحدة كبيرة في السن قد والدته جت تشتري)
الزبونه: لو سمحت يا ابني.. العبايه دي بكام
سمير: ب 250 جنيه
(وخرج بص برة مفيش اي حد معاها)
الزبونه: لالالا اخرها خالص
سمير: 220
الزبونه: طيب عايزة اشوفها قدي ولا لأ.. في بروفة هنا؟
(سمير بصلها ومردش خالص.. مش عارف يقول ايه.. مش عارف يتصرف ازاي)
الزبونه: انت تعبان ولا حاجه .. مالك
سمير: لا مفيش.. عندي صداع بس
الزبونه: طيب انا معايا برشام للصداع..(وفتحت شنطتها طلعت البرشام) خد أهو
(سمير الدموع نزلت من عينه)
سمير: ماشي ..شكرآ
الزبونه : العفو ياأبني.. ده واجب الناس تساعد بعض...كنت بقولك في بروفه هنا
سمير: (أفتكر كلام جابر لما قاله... لو مشيت حد مش هيحصلك كويس.. قالها) البروفه عندك في أخر المحل
الزبونه: ماشي..(ودخلت البروفه)
(سمير فضل يبكي.. ويقول انا ازاي عملت كده.. انا وديتها للموت بأيدي..)
(وباقي اليوم كان بييجي كذا واحد مع بعض مفيش حد تاني جه لوحده)
وطلع فرج ليه ومعاه 10الاف جنيه وقاله
فرج: دول حقك
سمير: انا مش مصدق.. معقوله .. الفلوس دي كلها ليا
فرج: طبعا.. وكل ما يكون في ناس اكتر .. كل ما الفلوس تبقى اكتر
(سمير عمل حساب ف البنك.. وبقى هيتجنن انا بقى عندي حساب في البنك...... وتاني يوم جاله زبونين يعني 20الف جنيه ..... ومرة ورا مرة بقى الموضوع بالنسباله عادي.. وهو كمان اللي بيتحايل على الناس تدخل البروفه تجرب الملابس)وبعد اسبوعين قرر يتقدم ل ناديه واتصل بيها
سمير: اخبارك ايه يا حبيبتي
ناديه: زعلانه
سمير: ليه
ناديه: على حال البلد.. وخبر كمان سمعته في الاخبار زعلني أوي.. تخيل كل يوم ناس تختفي ومحدش عارف بيروحو فين
سمير: سيبك بقى من حال البلد... عندي ليكي موضوع هيفرحك أوي
ناديه: ايه قووول
سمير: مينفعش في التليفون .. لازم نتقابل
ناديه: طيب .. نروح كافيتريا النور
سمير: ماشي .. اتفقنا
( واتقابله)
ناديه : ها فرحني بقى وقولي
سمير: شوفي معاد يناسب أهلك عشان اجي اتقدملك
ناديه: انت بتتكلم بجد ولا بتهزر
سمير: بتكلم بجد طبعا
ناديه: (والفرحه ف عنيها) انا مش مصدقه .. اخييييرا... بس انت ربنا فتحها عليك خلاص ولا ايه
سمير: ايوة .. المحل كان ماشي كويس اليومين دول
ناديه: الحممد لله.. انا هروح اصلي واشكر ربنا انه حققلي الحلم ده
سمير: يارب دايما اشوفك فرحانه كده.. واقدر اسعدك
ناديه: حبيبي يلا نمشي.. عشان اقول لأهلي
سمير: نمشي ايه .. احنا لسة مشربناش حاجه
نادية: اوكي.. نشرب اي حاجه..ونمشي
(نادية كلمت اهلهاوراح سمير اتقدملها هو و اهله .. واهل ناديه وافقه وبعد شهرين خطوبه)
سمير: عايزين نتفق على معاد الفرح مع أهلك
ناديه: فرح ايه ... انا لسة مجهزتش حاجه
سمير: انا جهزت كل حاجه خلاص
نادية: جهزت منين.. ولو انت جهزت انا لسة
سمير: يابنتي جهزت الشقه.. والفلوس بتاعة العفش كلها معايا.. يعني هتروحي تنقي بس اللي انتي عايزاه ونشتريه.. مفيش داعي نطول في الخطوبه
ناديه: انت جبت الفلوس منين
سمير: ماانا قولتلك المحل شغال كويس
ناديه: ياااسلاااام عايز تقنعني ان كل ده من المحل
سمير: ايوة
ناديه: يا سمير انت جبت الفلوس منيييين
سمير: بقولك ايه .. ما علينا .. نتفق امتى
ناديه: انت اتعصبت عليا كده ليه.. برحتك شوف المعاد اللي يناسبك.. ونتكلم في الموضوع ده بعدين
سمير: ولا دلوقتي ولا بعدين الكلام خلص
(ناديه سكتت.. لكن مستغربة اوي من رد فعل سمير.. وليه اتضايق كده)
(وبعد يومين كلم سمير واهله أهل ناديه واتفقوا على معاد الجواز.. واتجوزوا سمير و ناديه)
... وبعد سنه
سمير وناديه .. خلفوا ولد عنده شهر
وسمير كل يوم فلوسه بتكتر اكتر واكتر.. وناديه واهله نفسهم يعرفه هو بيجيب الفلوس منين وطبعا هو رافض تماما
ناديه التفكير كان هيجننها ..اتصلت ب صديقتها هاله
ناديه: عاملة ايه يا هاله
هالة: الحمد لله تمام.. انتي اخبارك ايه يا نونو
ناديه: انا عقلي وقف من كتر التفكيير.. في موضوع عايزة اتكلم معاكي فيه.. بس اوعديني الكلام ده مويوصلش لحد
هالة: يابنتي انتي هبله.. يعني معقوله هتقوليلي سر وهوصله لحد
ناديه: انا مكنتش عايزة اتكلم في الموضوع ده .. لكن لازم حد يفكر معايا.. ياهالة سمير بيصرف علينا كتير اوي.. مش بيخليني محتاجه حاجه.. الحاجه قبل ما اتمناها بلاقيها قدامي.. وكمان هو اللي جهز الشقه لوحده.. مخلانيش اجيب حاجه خالص
هاله: ماشاء الله تمام
ناديه: تمام ايه بس.. جاب الفلوس دي كلها منين.. انا كل ما أسأله يتعصب عليا.. واحنا بقى عندنا أبن.. خايفة اربيه من فلوس حرام
هاله: حرام ايه بس.. فال الله ولا فالك.. بس بصراحه.. انتي عندك حق تشكي
ناديه: اعمل ايه بس هتجنن
هاله: مممممممم انا عندي فكرة
ناديه : قولي
هاله: روحي وراه وراقبيه.. شوفيه بيروح المحل فعلا ولا لأ
ناديه: لا ياختي .. لو شافني هيزعل مني اوي.. وانا مقدرش على زعله
هاله: طيب ممكن تاخدي النقاب وعباية من عند أختي.. عشان هو ممكن يعرف العبايات اللي عندك.. والبسيهم وروحي وراه.. ساعتها مش هيعرفك
نادية: تصدقي فكرة.. طلعتي بتعرفي تفكري أهو
هالة: اماال يابنتي.. هتيجي تاخديهم امتا
ناديه: بكرة .. وبعد بكرة هروح وراه
هالة: تمام .. ماشي
(تاني يوم لبست النقاب و العبايه واخدت ابنها وراحت وراه..لقيته راح المحل عادي..وقفت على جنب واتصلت ب هاله)
ناديه: تصدقي شكلي ظلمته.. ده راح المحل عادي أهو
هالة: طيب كوييس.. عشان تطمني
ناديه: بس عنده حتة فستان.. عيني هتطلع عليه
هالة: روحي اشتريه
ناديه: لا ما هو لو شافه .. هيعرف اني روحتله
هالة: يعني هو مفيش زيه غير عنده.. عادي انا جيته ليكي هديه.. متخليش نفسك ف حاجه روحي اشتريه
ناديه: طيب انا هروح.وهغير صوتي عشان ميعرفنيش. وهبقى اقوله انك انتي اللي جبتيلي الفستان هديه يلا سلام
هالة: اوك .. سلام
(راحت ناديه ل سمير.. وغيرت صوتها ..عشان ميعرفهاش وغطت ابنها عشان ميعرفوش)
ناديه: لو سمحت.. الفستان ده بكام.
سمير: ب 300
ناديه: حلو اوي.. انا عايزاه
سمير: طيب مش هتقيسيه
ناديه: لا.. هو شكله على قدي..
سمير: لا.. شوفيه على قدك ولا لأ .. عشان مفيش ترجيع. البروفه في اخر المحل
ناديه.. عند المراية اللي هناك دي
سمير: ايوة
ناديه: ماشي
(دخلت ناديه البروفه.. واول ما دخلت داخت خالص من المخدر.. سابت ابنها في الارض وبعدين فقدت الوعي خالص ونزلوها تحت الارض.. )
فرج :(رفع النقاب)..ايه ده.. دي نادية مرات سمير
جابر: معنى انه دخلها البروفه انه ميعرفش انها مراته.. ادبحها خلص
فرج: طيب وده اكيد ابنه.. ولسة صغير مش هايلزمنا في حاجه
جابر: اقتله هو كمان .. هنطلعه ازاي لوحده
وبعد ما اليوم عدى وخلاص سمير هيقفل.. راحله هاني
هاني: اهو حقك النهارده.. نزلتلي راجل و ست ..20 الف
سمير: لالالا الست اللي نزلتها كان معاه ولد صغير
هاني: لا ده مينفعش.. احنا خلصنا منه .. لكن مش هيفدنا بحاجه
سمير: خلاص .. مش مشكله
(سمير اخد الفلوس حطهم في البنك.. ورجع البيت..مش لاقي ناديه.. سأل كل اللي ممكن تكون عندهم.. مش لاقيها .. فات تلاث ايام وطبعا هي ملهاش اثر.. بقى بيروح المحل مضطر خايف من جابر.. لغاية ما افتكر انه نسي يسأل هالة اتصل ب والدة ناديه وطلب منها رقم هاله.. او عنوانها.. قالتله انها متعرفش رقامها وقالتله على مكان بيتها وراح لها البيت.. فتحت والدتها)
سمير: لو سمحتي.. هالة موجوده
أم هالة: ايوة.. مين حضرتك
سمير: انا جوز صاحبتها ناديه
أم هالة: اهلا وسهلا.. اتفضل
(دخل سمير وقعد ف الصاله)
(هاله طلعت من الأوضه عشان تسلم عليه)
هالة: أهلاااااااااااااا .. سمير .. كنت جاية ليكم النهارده اسأل على ناديه.. اصل موبايلها مقفول .. قلقت عليها
سمير: ايه .. يعني انتي متعرفيش هي فين
هالة: ازاي؟؟؟
سمير: نادية مختفيه بقالها ثلاث ايام ومعاها ابني
هالة: ازاي بس.. بقالها ثلاث ايام .. يعني يوم الاحد صح
سمير : ايوة
هالة: انا هقولك على حاجه.. بس بالله عليك متزعلش من ناديه
سمير: ازعل ايه .. انا هموت من القلق عليها
هالة: ناديه يوم الاحد راحت وراك المحل.. كانت عايزة تطمن انك بتشتغل في المحل فعلا..ودخلت تشتري من عندك فستان
سمير: لأ مجاتش عندي
هالة: هي كانت لابسة نقاب .. عشان كده انت معرفتهاش
سمير: (والدموع ف عنيه) هالة انتي بتقولي ايه
هالة: مالك
سمير: انا عايز امشي
هالة: مالك يا سمير
(سمير مشي وهو بيبكي ويكلم نفسه.. انا قتلت مراتي وابني.. كانت كل احلامي اتجوزها ولما اتجوزتها قتلتها.....فضل يكلم نفسه لغاية ما وصل القسم وشاف مجموعة شباب قدام القسم)
سمير: لو سمحتوا.. انا عايز ابلغ عن جريمة قتل
رد واحد من الشباب: ادخل للظابط محسن
(سأل سمير على الظابط محسن وراحله)
سمير: انا عايز ابلغ عن جريمة قتل.. لالالا مش جريمه جرايم
الظابط: مين قتل مين
سمير: انا .. قتلت مراتي وقتلت أبني
الظابط: ليه عملت كده
سمير: مكنتش عارف.. .. انا عشان احافظ على نفسي قتلت كتيييير
الظابط: انا مبقتش فاهم حاجه
سمير حكاله كل حاجه.. من اول جابر ما راحله لغاية ما قتل ابنه ومراته
.. واتقبض على سمير وجابر وفرج وهاني وماجد وصاحب المستشفى اللي متفقين معاه.. واتحكم عليهم بالاعدام ..وقفل المستشفى والمحل.
والدة سمير واخته اشتغله علشان يصرفوا على نفسهم
ـــــــــــــ
‫#‏بقلم_زوزيتا‬

تابعو زوزيتا على Facebook على

بقلم / زوزيــتا